Di pasta choux, farcita di crema pasticcera e dolci amarene, protagonista del giorno di San Giuseppe é sicuramente la zeppola
E proprio alla zeppola di San Giuseppe il poeta napoletano Arturo Trusiano (1887-1953) volle dedicare una poesia dal titolo: ‘A zeppola ‘e San Giuseppe.
A zeppola ‘e San Giuseppe
Chiove… Po schiove… Trase e gghiesce ‘o sole…
Po tutto ‘nzieme vence primmavera:
se schiara ‘o cielo, addorano ‘e vviole
e ll’aria se fa tènnera e liggera.
Tutt’ ‘e vvetrine ‘e zèppole so’ zzeppe,
zèppole prufumate ‘e vainiglia,
quase ogne ccase tene nu Giuseppe,
c’è festa, se po’ ddi’, p’ogne famiglia.
Fore a nu vascio sona nu pianino,
chiagne ‘o criaturo ca vo’ ‘a pazziella,
chino ‘e cannele vide ogne altarino,
p’ogne puntone ce sta na tiella.
Sciore – siente alluccà – che bello sciore!
Addora ‘a viola! Addora ‘a viola ‘e Pasca!
Se mmèscano ‘e zzandraglie cu ‘e ssignore,
apre ‘a cantina e mette n’ata frasca.
Da piazza Municipio ‘nzino a’ Posta
so’ a ccentenare, a mmille ‘e bbancarelle…
Na folla ca s’accosta e po’ se scosta:
giucattole, aucielle, caramelle.
‘A lengua ‘e Menelicco, ‘e palluncine,
‘o bbene ‘e Dio ce sta pe’ chesta strata,
‘e ggiuvinotte appriesso ‘e ssignurine,
‘o fidanzato affianca a’ fidanzata.
Da miezo a’ folla spicca na paglietta,
chi spuzzulea ‘a fresella, chi ‘o tarallo,
‘ncopp’ a ll’altare San Giuseppe aspetta
arravugliato dint’ ô manto giallo.
(Arturo Trusiano)
